唔做律師轉投教育界兼娛樂圈嘅林作，日前佢以「自慰式」批評今屆出爐狀元全部都揀將來做醫生，結果俾網民圍插。(新聞連結： http://bit.ly/2sXf1ps )點知咁啱得咁橋，林作喺網絡電影《奪命追兇》就係飾演醫生！

今日林作喺尖沙嘴出席開鏡，講到會唔會覺得好諷刺，佢笑言：「我前日先發覺原來今次係做醫生，之前一路冇特別去記住，呢啲真係無獨有偶，不過冇乜嘢諷刺！」對於俾網民圍插嘅事，林作話：「其實我之前都試過因為一啲言論而惹嚟反響，但係今次我夠膽講係最多人撐嘅一次，支持我嘅比例係出奇地多，最欣慰係收到好多好多私人訊息，有學生，亦都有家長，佢哋話非常同意我講法，呢個真係前所未見！」林作仲話：「我o依家都覆唔晒啲訊息，有人留言話本來唔鍾意我，但係今次話真係撐我，同之前情況好唔同，不過我都會堅持繼續做自己，我夠膽講我係敢言！」

唔知佢有冇覺得做藝人比做醫生更有影響力？佢話：「有網民問我應該最好做乜嘢，我唔覺得一定要限死做乜嘢行業，反而覺得每個行業必須要有頂尖嘅人物，嗰幾位狀元真係好叻，係高人，所以高人應該喺唔同領域發展，而唔係局限喺一個領域，呢個係唔健康嘅發展。」

至於舊愛麥明詩日前出席活動亦公開撐佢(新聞連結： http://bit.ly/2uZ1Bee )，林作話：「我都係聽人講先知道，呢幾日我都冇留意其他新聞，Bob哥叫我把握今次機會，多啲同網上嘅人交流，對我嚟講頗為享受，大家傾緊一件有意思嘅事，所以我唔答佢(麥明詩)嘅問題喇，同佢協議過我唔再講佢嘅事！」係咪對方有怨過？佢就話：「我覺得咁樣係對我同佢最好，講佢對我完全冇好處，之前經驗話我知，講乜都死，總之我搞掂自己先，自保呀！」