唔知係唔係實在太擔心揸住4.99%嘅富通集團，會由毫子股進一步變成仙股，到時就真係想唔撇賬到零都唔得，上個禮拜平保（2318）居然諗到搵阿爺出面，幫佢向比利時政府尋求賠償，希望可以為呢筆巨額虧損搵番啲幫補，唔好輸得咁肉酸。

接收前股價已插水

之不過，比利時政府一於好少理，仲講到明叫平保死心，唔應該寄望從比利時政府嗰度獲得富通持股嘅相關賠償，比利時首相萊特姆仲好抵死咁同當地傳媒話：「我好理解平保會對呢個決定表示失望，但投資總要承擔相關風險。」乜咁似香港證監會嘅宣傳口號嘅。
萊特姆仲話，平保一直對富通嘅增長前景充滿信心，事後證明呢個並唔係一個正確嘅判斷，而中方提到股東所持股份價值大幅縮水（由差不多每股19歐元，跌到上個禮拜最低嘅0.568歐元），其實喺比利時政府插手富通前就已經發生。咁即係暗示平保投資眼光唔夠，自己衰咗就唔好賴地硬啦。
雖然平保提出，話比利時政府今次變相將富通收歸國有，用呢個理由索償，表面睇嚟有理，但係賠得畀你，其他富通股東通通都會撲埋去要求賠償；而且收歸國有都係俾山姆大叔所害，你估佢想攬上身㗎咩。
不過，外交即係外交，佢哋政府發言人一方面話，上個禮拜五已經同處理呢單嘢嘅相關人員見過面，比利時願意繼續同中方協商解決問題，但同時又證實咗首相上述言論，即係話意見接受，態度照舊啦。

李華華
mailto:[email protected]