立法會補選中喺三區直選勝出嘅三男，包括民建聯鄭泳舜、新同盟范國威同區諾軒，今日同樣以候任議員身份見咗財爺陳茂波，仲齊齊走入立法會，喺咪兜回應傳媒查詢。撇除重返議會嘅咖喱范，兩名議會新丁表現係點？鄭泳舜雖然有時都要睇下貓紙，但表現尚算淡定，區諾軒則唔使貓紙已經講晒心中所思所想。

獲分配使用立法會901號房做辦事處嘅區諾軒話，呢間係香港眾志羅冠聰用開嘅房，笑言呢間房好似有詛咒，用過嘅議員都會「出事」，包括2016年落選嘅民協馮檢基、以及遭政府無理DQ的羅冠聰，但佢絕不介意，因為周庭已提出選舉呈請，希望阻止政府透過選舉主任無理取消港人參選格，一旦成功，佢嘅議員資格亦會喪失，「所以我最有資格用901啦！」，而未來開大會會坐羅冠聰個位，即係坐謝偉銓同朱凱廸隔離，形容「有辣有唔辣啦！」