呢兩個交易日，港股又嚟逆轉，唔見差唔多400點，認真難玩。之所以晉佳上一期講到，要買都一定要揀有把握成為強股嘅股份，先有條件抵抗反覆不定嘅上落市之餘，仲能夠有錢贏。
上一期介紹嘅海隆控股（1623），推介後股價升多兩日，不排除短線要唞唞，但向上重估嘅旅程肯定未完成，可以等調整再買。
至於近期另一隻寶藏，就係珠江船務（560）。佢主要從事珠三角嘅貨運、客運、物流業務，呢類內陸運輸相關業務，穩定性遠比國際航運股為高，市賬率1倍左右，市盈率14倍，財政健全，淨現金1.7億元，佔市值約一成，估值絕對合理。
晉佳本身已經備忘呢隻股好多年，最深印象係曾經出席一個媒體飯局（唔記得時間，斷估兩年半前），主角已經唔記得係邊間上市公司，散席過後，同一位公關姐姐傾開偈，發現佢負責嘅公司包括珠江船務，然後晉佳自然反應地爆出一句「好嘢嚟㗎喎！」對方回應：「你又知嘅，之前有個fund man都話呢隻係好嘢，不過好難收貨，所以先炒唔起。不過，管理層似乎近排開始想見吓人，高調番少少。」由此可見，市場上唔少人都識貨，爭在你眼望我眼，個個冇落注。

股價爆升　或有好消息

珠船嘅故仔收埋咁多年，去到近期先有新發展，先喺5月初換咗總經理，最近股價就連環爆升，上星期五急升13%之後停牌，跟住就宣佈發1.8億股認股權證，每股行使價2.20元，跟住繼續爆升兩日。
呢類紅籌公司，通常股價爆升唔係有注資就有新計劃跟尾。眼前呼聲最高嘅好消息，睇嚟係前海、橫琴規劃最快喺6月應該有新嘢公佈，手握珠三角運輸物流業務嘅珠船，有可能喺橫琴規劃當中大為受惠，𠵱家有乜好嘢真係估唔到，但係1.8億份行使價2.20元嘅認股權證，足夠令大戶一次過收齊貨，股價即時開車唔使等人，就知道係時候反映好消息。晉佳估計，珠船未來股價有能力升到去遠高過2.20元，中線大可睇住3元先。

晉佳
本欄逢周一、三及五刊出