韓國男星宋仲基早前拍攝同宋慧喬主演嘅新劇《太陽的後裔》時，因為拍攝中途受傷，整親手臂要打石膏。

原本就話宋仲基嘅傷勢唔係好嚴重，睇埋報告就知幾時可以開工，不過今日宋仲基所屬嘅BLOSSOM事務所就為宋仲基受傷一事回應，BLOSSOM方面話：「診斷結果今日啱啱出嚟，宋仲基嘅膊頭同腿部挫傷，部份位置骨折。目前宋仲基正喺接受醫院嘅物理治療，由於骨頭癒合嘅速度因人而異，因此要睇佢嘅治療過程同恢復狀況先再決定日後嘅復出時間。」

宋仲基方面仲話現階段究竟幾時可以回歸劇組繼續拍戲真係好難下定論，言下之意似乎宋仲基嘅傷勢都幾嚴重。而《太陽的後裔》嘅劇組亦都話：「目前，我哋正拍攝其他人嘅戲份，拍攝過程亦都好順利，對於播出時間亦都無影響。」

由於《太陽的後裔》預計明年2月播出，加上選擇同內地同步播，所以事前要畀內地作審批先，今次宋仲基受傷，自然令到拍攝進度更加緊張。