現年32歲嘅台灣藝人陳妍希早前拍攝內地劇《神鵰俠侶》演小龍女，同劇中嘅「楊過」陳曉爆出姊弟戀，28歲嘅內地小生陳曉更打鐵趁熱，火速向陳妍希求婚，女方亦一口答應，陳妍希上個月底以陳家未來新抱嘅身份，趁有空檔，跟男友返安徽合肥老家見父母同祭祖，情濃時兩人仲不避嫌兩度喺公園甜蜜錫錫。

二人抵達合肥之後，先去餐廳用膳，平來陳妍希入去嗰陣係兩手空空嘅，點知食飽出嚟，手上多咗一束鮮花，明顯係陳曉精心安排，難怪攻陷到陳妍希嘅芳心，男友喺上、下車時，都有幫陳妍希開閂車門，大晒體貼嘅一面!

隔日佢哋離開酒店去咗公園散步，二人除咗十指緊扣，陳曉仲從後環抱女友，陳妍希回頭一臉笑意，男友即深情一吻再吻，走出公園，陳曉仲跪地為陳妍希綁鞋帶，又怕女友着涼，除咗件外套俾陳妍希披住，跟手佢哋買咗兩紮花，返到老家見陳曉嘅父母。

陳妍希見完家長，隔日佢同陳曉坐車去咗郊外一間山莊餐廳，男友先介紹陳妍希俾家族中嘅長輩同親友認識，陳妍希亦全程依偎着男友跟男方親友影相，之後陳曉同陳妍希被發現買花到蜀山烈士陵園祭祀，再手牽手回到陳曉家。

據內地媒體報道，一對準新人目前正籌備婚事，最快出年夏天就結婚，陳妍希日前被問會唔會帶男友去台灣見家長時，陳妍希透過經理人表示「雙方都沒有工作的空檔會安排」。

另外，陳曉今日喺微博發文對被偷拍祭祖頗有微言：「其他都算了，上墳的圖片你拍他幹嘛！最後的一點點你也要拿來賺錢嗎？那是我奶奶！！！求！！！弄死我一個就好了千千萬萬放過我家人！！！」