關德興師傅嘅《黃飛鴻》電影陪住唔少港人成長，原來戲入面嘅寶芝林依然存在。新近聽聞，由關德興嫡孫關照洋擔任主席嘅「香港寶芝林」，將於本周五在港開記者會，同內地一間藥堂簽約，似係要將公司發揚光大喎。

睇番「香港寶芝林」官網，最吸引人嘅，當然係關德興嫡孫關照洋嘅簡介，佢好勁喎，係「旅居香港的美籍華人著名愛國慈善家，是少林寺入室弟子第34代拳法傳人，美國巨星NEVA關門弟子」，又指佢秉承爺爺關德興行善嘅美德，傳承寶芝林仁愛精神，發展慈善事業，成為全球最年輕嘅慈善博士。

據了解，關照洋今年只得18歲，家陣仲喺美國讀緊書，本周五唔會現身見傳媒，公司實際管理應該係交由其他董事負責。官網另外有介紹榮譽主席丁丁。根據資料，丁丁正是關照洋媽媽，佢老公就係關德興長子關漢泉。

2013年，佢哋一家三口曾經來港設宴，透露關照洋喺美國已簽約模特兒公司約一年，仲有安排拍廣告同電視演出。

官網介紹寶芝林嘅業務就更厲害，涉及醫藥、慈善、保健、金融、影視等等，仲有香港寶芝林藥局、寶芝林養生山莊等等；本周五記者會就係宣佈同內地一間藥堂簽約。成件事真係好令人期待呀。

掌握財經生活資訊，即Like「蘋果ATM」fb專頁啦！
http://fb.com/appledailyatm