《波鞋Guide》嘅推出就係為咗畀廣大讀者，喺買鞋之前可以有一個分析球鞋功能的參考地方。而今次為我哋打響頭炮嘅波鞋就係即將在港發售，NBA當今嘅天之驕子、魔術球星麥基迪專屬鞋款──T-MAC2。
簡約流線設計「靚」
T-MAC2畀我第一眼嘅感覺喺好靚，對鞋繼承咗1代嘅簡約、流線型設計，鞋頭五間嘅設計搶眼之餘又冇破壞整體美感，重同魔術球衣旁邊嘅五線直紋互相呼應。傳統嘅三間標誌除咗刻喺鞋側，鞋背嘅硬膠部份亦有印上，低調得嚟又有加強保護足踝效果，好有心思。
T-MAC2仍然沿用adidas3DTorison支撐系統，呢樣喺意料之內，冇咩驚喜。鞋底軟硬適中，而且好貼地，提供到足夠嘅保護又冇減低靈活性。前腳掌部份則採用adiPRENE設計，加上鞋底嘅魚骨紋，就算跑緊都好易急停，再起動都有足夠動力支持。
「內櫳」加厚夠舒服
可能大家睇得多NBA，打波嘅時候通常都係着「腳眼襪」，其實咁樣幾易受傷。T-MAC2今次就係鞋腳踝嘅「內櫳」加厚咗內裡，着上腳好舒服，好貼足踝，不過腳眼保護部份比較低，近似一對低筒鞋但整體保護性都算唔錯。可以話係一對為強調速度同「第一步」進攻嘅後衞型球員，度身訂做嘅波鞋。
最值得留意係鞋嘅足踝側，印咗T-MAC代表標誌──一個由1號同T-MAC字樣組成嘅新icon，相信亦意味adidas籃球鞋正式進入麥基迪時代！