究竟貓貓狗狗可唔可以同BB又或者大肚媽媽共存，呢個問題一直都有好大嘅爭議，每次拎出嚟討論，即使拗到面紅耳熱，都唔會有一個答案，真係公說公有理，婆說婆有理。

喺兩年前做咗醫生人妻嘅官恩娜(Ella)，生咗囝囝Garbriel(bébé G)後，一直專心湊仔，正當大家見佢貼咗入錄音室嘅相，以為佢將會復出，點知喺上月中拍咗一段一家三口嘅短片，宣佈將會再做媽咪，預產期喺明年1月。聽講今次陀B嘅Ella，害喜反應幾嚴重，日日都嘔，搞到體重不升反而跌咗幾磅。(新聞連結： http://bit.ly/2eYMrPQ )

唔知係咪Ella已經陀b近5個月，所以佢嘅害喜情況逐漸有好轉，於是乎回復正常嘅生活，今日Ella喺ig貼相，見佢戴口罩又紥晒頭髮，好專心咁幫狗狗做美容，佢仲留言話：「之前因為嚴重嘅孕吐，有兩三個月時間唔可以每日幫Bisous刷牙，將呢個重任交咗俾屋企個姐姐，呢兩個星期終於覺得好番啲，一檢查就發現原來姐姐一路都冇幫佢啲牙刷乾淨，搞到我好心痛。」

Ella仲話：「其實我都明嘅，隻狗係我自己嘅，一定要我照顧番先得！根本我都唔放心俾其他人照顧佢！呢個承諾係一生一世嘅！唔可以因為大肚或者有咗小朋友就棄養或者唔理自己隻狗！之前因為嚴重鼻敏感，做咗個血液測試發現原來我對貓狗敏感！但我都冇一刻諗住唔要Bisous ! o依家幫佢刷牙同梳毛嘅時候會帶埋口罩同滴定防敏眼藥水！咁就okay！」再hashtag「19weekspregnant」、「大肚婆之日常」、「係着咗老公件瞓覺白T」

唔少網民即刻留言讚好，Ella話唔知自己對狗都敏感，唔知點解可以養咁多年狗，跟住有人話希望個個人都好似佢咁有心，亦有人Bisous刷牙乖唔乖，Ella亦都有回覆話：「有時都會扭計，不過因為我好熟佢脾性，所以就容易啲擦到。」甚至有人讚佢係好媽咪好主人同好老婆！