近年靠整盤生意搞上市發股市財者，幾多富豪由此而生，消費市道自然好景。
根據Dealogic初步統計，中國企業第三季度IPO融資額達創紀錄的382億美元，涉96家公開上市，佔全球IPO融資總額77%。今年以來更已累積730億美元融資額，係07年第4季之291億美元以來新高，而且淨係IPO數目就已經唔係嘢少。
要講賺錢賺得最多嘅一批人當然係公司上市前嘅舊股東，為了順利成功上市吸資，企業唔介意畀些少甜頭私募基金或創投基金，反正股票只係開印刷機就要幾多有幾多。

造勢人入局

發白條一向係歐洲傳至美洲再嚟亞洲嘅遊戲，股票與白條或者空頭支票，其實只係字面上有分別。難得大小投資銀行將呢個幾百年嘅印公仔紙遊戲玩得出神入化，結果玩死埋自己及雷曼兄弟。美債又好、美元又好，都只係一張張白條，發行人要為市場營造唔買就蝕有買趁手嘅勢，簡稱「造勢」。QE2量化寬鬆其實都係「開白條」，食霸王餐。
現時嘅股市新聞，亦成為各大專院校非相關學科學生嘅日常話題，有大學教授甚至話連讀中文科嘅學生都對股票代號冧巴琅琅上口。難怪香港第一才子在其電台節目裏面一竹篙打一船人話，香港通街都係老千，尤其是喺中環着西裝打領呔攞工商管理碩士嗰班。點講好，金融世界跟紅頂白勝者為王，壞事你唔做大把人做，但係你一樣要面對股東，可以扮清高咩！
地產界有白旋風之稱嘅「資深」投資者「豹哥」陳清白，同樣以老千市一語道破家樓市嘅假象，佢話市旺就自然多老千。阿甲可以將個盤掟畀阿乙，甚至開兩間BVI左手交畀右手整個靚價甚至市場新高成交價，為手上其餘嘅價而沽貨製造指標價。唔同界別竟然都發現同類人辦，唔通香港已被老千攻陷？
胡孟青
獨立股評人