傳媒每逢遇上IT難題，或者要查詢業界意見，除咗問立法會資訊科技界代表莫乃光，經常亦會搵堪稱傳媒之友嘅界內專家、香港資訊科技商會榮譽會長方保僑Francis Fong，但Francis大專時唔係讀IT相關範圍，點知越大越同IT結下不解緣。

Francis細個住喺牛頭角上邨，基層家庭出身，娛樂唔會多，好記得媽媽湊住佢同家姐阿哥細佬幾個化骨龍，會喺屋企車衫賺外快。

Francis自言細個讀書都幾乖，中學升至沙田官立中學；家陣係地區名校嘅沙官，Francis卻話當時佢入學時學校都幾雜，「打架、整人，乜都有」，唔知係咪因為當時個校長管教好嚴，令學校成績之後穩步上揚，當年同屆都有會考8A生。而佢成績則一般，入咗理工學院讀專業文憑課程（公司秘書及行政人員），「當時唔算好多科可以揀，資訊科技都未發達。」

咦，秘書課程喎，報讀學生係咪陰盛陽衰？「係呀，全班約40人，30幾個係女仔。」咁咪艷福無邊囉？「有拍拖，但冇下文喎。」佢話喺理工時唔算活躍，上過系會莊，但參與活動嘅人都唔多。畢業後第二份工做貿易，曾到尼日利亞出差，「想當年都22歲，係係人生第一次搭飛機，因為細過好窮，最遠去過汕頭返鄉下咋。」

佢憶述其中一次尼國之旅，「無命咁滯」。話說有日佢要去到當地一間銀行處理帳務，咁啱之前約咗個當地中國人喺銀行附近餐廳食早餐，「突然間聽到銀行傳出爆炸聲，仲要冒煙，事後知道冷氣機爆炸死咗兩個人，如果我早一個鐘去銀行，分分鐘都冇命返香港呀。」

死過翻生嘅佢，其後開始發展IT事業，同時都好關心政治。1989年64時佢讀緊理工，至今毋忘當年電視新聞畫面；除非不在港，每年都盡量抽時間去六四晚會，佢都希望港人同樣勿忘初衷。