當年今日
關於我們

鄧爾邦借毛主席擦女人鞋 - 李八方

蘋果日報 2006/11/23 00:00


雖然話呢個社會已經愈嚟愈重視兩性平等,但係男主外、女主內呢個觀念仲好普遍,最估唔到嘅,就係連平等機會委員會主席鄧爾邦都受呢一套觀念嘅影響!
噚日佢出席香港華都獅子會嘅聚會演講,話𠵱家讀法律有八成係女生,讀會計就有六成四,相信呢啲專業界別好快就會由女性主導。佢又搬毛主席出嚟話女性撐起半邊天好重要,不過佢講講吓又無啦啦指出,都仲有好多女性唔使做嘅,例如坐喺佢身邊嘅前東華三院董事局主席周振基嘅老婆,就有老公養,所以周太平時主要工作係買嘢扮靚,佢仲話「唔好睇小呢份工作,可以促進香港繁榮,都好重要㗎!」周振基隨即點晒頭話係,惹來哄堂大笑。
另外,席上又有好多獅子會會員問鄧主席好多有關「歧視」嘅古怪問題,例如如果你諷刺一個好樣衰嘅人係「靚仔」,又或者你唔話人「死肥婆」而係話人「靚肥婆」,咁會唔會犯法。
鄧主席就好有耐性再三重申歧視只係包括性別、殘疾及家庭崗位等。