50歲宣萱一向被譽為「最旺夫女主角」，跟宣萱合作過的男星也拿到視帝，宣萱經歷過6段戀情，可惜多年仍尋得真命天子。近日她和歐陽震華到崔建邦主持節目，老友鬼鬼，暢所欲言，宣萱談近年愛情觀，歐陽震華重提食物落錯格險死。

宣萱指以前相士說過她旺夫：「真實就冇，去到呢個年齡真係冇咩所謂，我見到身邊朋友開心嘅佔2至3成、唔開心嘅都有7成，令我睇透唔一定要結婚，除非係想生小朋友就要結啦，不然就想搵一個伴侶，好似朋友咁，唔係一定要有一個人喺度，你問我而家想要咩。如果有一個人出現就拍吓拖，大家一齊享受生活，去旅行食吓飯，唔係一定要結婚。」

宣萱坦言遇到合適的人會覺得開心：「人越大、經歷越多，有啲人行埋嚟，郁一郁條尾，我已經知佢想做乜（意圖），以前傻傻吓乜都唔知，人哋對我好啲，我就會覺得佢真係好好人，好到不得了，啲人就會同我講，你唔好咁天真，我都會覺得佢真係好人。而家啲人行埋嚟，你會知道佢做呢啲嘢有咩目的，唔係個個係咁，不過經歷多咗，好輕微郁一郁，我已經feel到佢嘅意圖。」

Bobby及張家輝曾為她「物色」對象，Bobby笑言要等那個人離婚就有機會，宣萱大笑講：「嗰時張家輝同我講，你去墳場，我問佢去墳場做咩?張家輝話咁嗰個人老婆死咗，咁個人幾好，又去拜佢老婆，但佢老婆又死咗，咁你就有機會囉。」Bobby代為解釋是指份人長情，宣萱又稱拍拖多年一直隨緣，不怕公開戀情，現時覺得做人最重要開心。

宣萱於1992年在倫敦大學帝國理工學院材料工程學畢業，她解釋自小喜歡理科：「知自己唔會做呢一行，但我唔知自己想做乜，就讀一科自己鍾意讀，呢一科主要係化學、物理同數學，我唔係好理性，大學被人逼去做舞台劇，就覺得演戲好好玩，畢業後把個舞台劇搬咗嚟香港做，排戲時就喺街被人發掘去拍廣告，只係睇中我對腳，當時個廣告只係見對腳咋，唔係見樣，哈哈！之後就拍朱古力廣告。」Bobby在旁邊大笑。

後來TVB向她招手，宣萱聽聞訓練班演員月薪僅3,000元：「我打定輸數諗住唔做，如果我大學畢業得3千蚊一個月，返去話畀爹哋媽咪知佢哋會好嬲，我諗住唔做，不過去interview又唔使錢就去試吓，點知畀我個薪酬又OK，我就簽3年試吓啦！一試就試咗29年。」Bobby亦認同宣萱對腳有99.5分。

1993年入行初期做K100主持，宣萱翌年開始拍劇，拍《壹號皇庭IV》時Bobby帶着演出，Bobby笑言宣萱性格跟一般女仔不同：「佢咩都知，係唔知醜，唔會覺得自己係新人，性格真係好好，唔會怯場，哈哈！係大笑姑婆，但係佢好聰明。話頭醒尾，我同佢係溝通到，佢拍《美味天王》，佢係第一個畀我噴水，佢肯呀！作為一個女仔，噴完面都OK仲要繼續做戲，好爽快！」

宣萱回想做過呂方及杜德偉MV女主角，最記得要扮昏迷的角色，不過自己因為緊張眼眉跳，當年歌星跟演員地位差距大，一接觸歌星就會緊要，她續道：「嗰時好Guilty（內疚），點解咁冇用，扮屍體都扮唔到，最終出街嗰個鏡頭要定鏡，因為拍唔到。」

宣萱拍劇多年，在劇中一共被綁架26次，最印象深刻是拍《雷霆第一關》，「去機場嗰邊海中有幾根木樁，我哋駛隻船出去，我要被綁喺木樁上，但隻船一駛埋去，見每一條木樁上面都有水曱甴，我好驚曱甴，我話我真係唔得，佢哋話你唔使驚，你一埋去就走晒，結果真係噃！嗰次真係最驚。」宣萱笑稱可能自己性格比較強硬，觀眾覺得她成功逃脫的可信性比較高。

Bobby於2013年被指「飲酒過量」而險死，他解釋當時拍《情逆三世緣》開工好攰，撞正初二放假，前一天就到朋友家食麻辣火鍋食足二粒鐘，又飲了一些酒，「外界傳我飲酒、飲得多過頭、中酒精毒都唔係，嗰兩個鐘頭係不斷咁食，飽都要食，我係下意識吞咗一口落肺（落進氣管），造成肺炎，家人見我成塊面紫晒就送我去醫院，好多人話靈魂離開身體，我有經歷係睇到自己，後嚟醫生都話你本來天光就已經走咗，但你8、9點又返嚟，佢哋唔係睇我個樣，係睇數據，血壓突然又往上升就係返緊嚟，醫生話可能我哋係做戲，捱得眼瞓，譬如會叫埋位啦，就會馬上醒，能力係比普通人強。而家會做一啲以前未做過嘅嘢，亦會對人再好啲」。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！