日本女星藤原紀香噚日宣佈同《半澤直樹》男星片岡愛之助結婚，並且喺今日舉行記招，以新婚夫婦姿態現身。44歲嘅紀香心情好興奮，今早已經喺網誌留言，感謝大眾對佢哋嘅祝福，開心感動到流淚，仲話自己準備出發去結婚記招。

一對新人喺中午現身東京帝國酒店，由於片岡係傳統歌舞伎演員，佢一身和服登場，新妻紀香亦身穿紫色和服，上台時片岡仲好紳士咁拖住紀香，紀香手上戴住三卡鑽戒，佢又發表賢妻良母宣言，話最緊要係要照顧好老公身體，而且44歲嘅佢仲話如果可以的話，希望會生小朋友㖭。