今日好多人為咗履行「五月之約」，呢幾日瞓街排隊，為求嘅係以正價買到一張飛，唔使俾黃牛搶晒。各區售票處都有人龍，「淪陷」得最犀利嘅，一定係尖沙嘴金馬倫里通利。

如果有幸買到飛嘅五迷，留意番，嗰日要預多啲時間準備入場。今次「五月天LIFE人生無限公司2018巡迴演唱會無限放大版」香港站於5月4-6日、11-13日舉行，今年唔再喺紅館，改咗喺香港迪士尼幻想道露天場地開戶外騷。

大會暫定安排7點15分準時開騷，《蘋果》收到消息稱，觀眾無論坐位企位，都要喺下午5點開始進場，而且一定要提前入場。

基於保安理由，工作人員將會喺進場時檢查觀眾嘅隨身物品，至於場內守則，同禁止帶入場嘅物品，主辦單位稍後先會公佈。

最後就係，留意番，由於演出場地唔設私家車停車位畀觀賞演唱會人士，各位「五迷」入場就記住乘坐公共交通公具。

精選娛聞，喺晒《娛果》
http://fb.com/appledailyent