曾演出韓國節目《Show Me The Money》第5季，並獲得亞軍嘅25歲Rapper C Jamm，早前被爆涉吸食大麻遭警方拘留起訴。當時報道指C Jamm由去年2月至今年4月有10次購買大麻嘅紀錄，合共112g，而C Jamm接受警方調查時承認有吸食大麻，稱係因為好奇心及緩和音樂活動上嘅壓力，上月尾已收押至水原監獄等候審訊。

警方喺調查過程中，發現C Jamm唔止吸食大麻，同時吸食少量搖頭丸，故以吸食大麻、搖頭丸等罪名起訴C Jamm。不過據警方嘅最新消息，C Jamm嘅毛髮檢驗結果，對搖頭丸嘅反應呈陰性，即證明唔到C Jamm有食搖頭丸，所以警方推測C Jamm食到假嘅搖頭丸嘅可能性好大。亦因檢驗唔到C Jamm有食搖頭丸，所以佢將不被起訴「吸食搖頭丸」一罪，意外減少C Jamm嘅罪名。

而網民對於C Jamm因疑食假搖頭丸而少一項控罪嘅報道感到好嬲又好笑，有網民寸爆留言：「吸毒都食到假貨，應該笑定應該喊？」、「犯罪者變受害人」、「我朋友唔吸毒都創作到音樂」等。

更多韓流，喺晒《娛果》
http://fb.com/appledailyent