噚日禮拜一,港交所(388)升32.1元,收190.1元,成交額74億元,差唔多1billionUSDollarcash。禮拜五,政府增持港交所股份,孫柏文唔知噚日繼續買上去嘅資金,係散戶定係政府。不過都係核突。
今日,我想首先恭喜曾俊華司長。佢已經成功將所有真正有效分配資金嘅人,殺晒。亦坐大嗰啲唔識有效分配資金,不過成功估到,曾司長覺得乜嘢先至係最有效分配資金方法嘅人。對特區長遠經濟,真係可喜可賀。
呢幾日,好多人都估點解政府要增持港交所。而曾司長已經講咗好多,講過等如冇講嘅理由。所以,大家要繼續估。我哋《蘋果日報》財經版喺禮拜六,有拆局特稿估話:「為港滬交易所日後正式『結婚』締造平台……許下5.88%股權的『聘禮』」即係猜測會港滬交易所合併,政府持有股份做交易。我覺得咁睇係錯。
如果要出讓股份畀滬交所,根本毋須要政府今日買。到時候要交換股權,只要滬交所出價合理、條件好,小股東一定支持。以前冇GeneralMandate,唔係因為反對批股,小股東只係想批股前得到他們同意。