當年今日
關於我們

隔牆有耳:12A*英會考狀元父親科大任教 - 李八方

蘋果日報 2007/08/29 00:00


9歲神童沈詩鈞早排選擇落腳浸會大學,搞到科技大學白忙一場。不過科大唔使灰心,正所謂神童「梗有一個喺左近」,八方近日收到料,科大計算機科學及工程學系副教授丁存生位公子丁祥,原來都係神童一名!
據丁教授透露,小丁今年報考英國會考(GCSE),日前放榜,結果考獲12科A*級另加1科A級佳績,最重要係小丁今年只有15歲,比大部份考生年輕兩歲。一般人考GCSE報10科已經算多,小丁年紀輕輕就考獲12科A*級,堪稱狀元中嘅狀元,形容佢係神童不為過。

IQ高達160

小丁喺西安出世,由於丁教授周遊列國去教書,所以小丁細細個已經去咗歐洲同新加坡讀書,幾年前丁教授加盟科大,佢又嚟咗香港入讀英皇佐治五世國際學校。小丁同八方講,曾經做過IQ測試,佢智商高達160!丁教授卻話一直唔知小丁咁醒,因為佢從來唔催谷小丁讀書,只會引導佢提起學習興趣,建立自信同閱讀故事書,佢話教神童唔使咁多花招,一於無為而治。小丁話希望將來到英、美留學讀數學。科大今次近水樓台,八方希望校方唔好嘥料,小心又俾人截糊呀!