同光頭仔傾起親子理財呢個話題，佢好慨嘆話：「家陣啲細路，以為啲錢係嚟自提款機，買嘢碌卡就得，點會識乜嘢節儉、儲蓄吖。」尤其𠵱家啲父母當仔女如珠如寶，要乜嘢都買畀佢哋，小朋友又點會知道搵錢艱難。

不過，香港係物質主義社會，一開始就向小朋友灌輸「慳」、「節儉」概念，物極必反。敏妮都係環保支持者，亦明白節儉係美德嘅道理。不過，與其教小朋友慳，敏妮認為不如教佢點樣賺錢，知道賺錢艱難，咁佢自然識得珍惜。
光頭仔就喺呢個層面，再繼續發展，「敏妮，你成日都話，與其畀飯佢食，不如教佢點搵食，我就話最緊要教佢點錢搵錢。」佢嘅方法聽落都幾有用，即管同大家分享吓。
光頭仔唔係「炒鬼」，但都算係一個活躍嘅股票投資者，佢話日後畀零用錢個仔嘅時候，會以基金經理身份游說佢參與投資，大家一齊買某隻股票，「當然，細路唔可以亦唔夠錢買賣股票，但我可以按佢投資嘅金額，計算佢喺我哋兩仔爺投資組合中嘅比例；沽出咗股票時，佢就可以分到部份嘅投資利潤。」

當然投資有賺有蝕，假設光頭仔父子一齊喺114蚊買一手滙豐，佢個仔投資500蚊，約佔投資1%。當滙豐升到118蚊沽出，扣除使費，大概就賺千二蚊，阿仔連本帶利可以攞返512蚊。對於大朋友12蚊就梗係微利，但對小朋友嚟講應該幾開心。股市呢個場地，根本就唔會提供長勝不輸嘅環境，小朋友亦可以經歷吓點面對投資失誤。

http://wanmanli.com/blogs/