近期經常有龍尾股爆升，於是日日都有人話炒龍尾所以就快見頂，但日日都仲有股喪炒緊，死唔斷氣。見到龍尾炒起就唔敢落注，另一邊廂機會分分鐘白白溜走，咩玩法？

今時今日，龍尾股炒起等於水尾呢種現象，應該分割為一個個唔同sector去睇，自然有另一種觀感。例如上個月中，中海油（883）、中石油（857）呢批終極龍尾藍籌爆升，於是藍籌之中嘅強勢股騰訊（700）、滙控（005）股價開始唔上唔落；至於科網板塊之中，炒到高偉電子（1415），然後早前被隊散嘅ASM（522）翻生，連中芯（981）都爆升，龍頭舜宇（2382）、瑞聲（2018）就開始升唔起。近排內房股升都冇恒大（3333）份。咁究竟塵爆細價股都識反彈嘅時候？係咪連二三線股都準備收皮？的確，呢一刻又似炒到攰攰哋。

北韓消息一鼓作氣、再而衰、三而竭，本來難以連日拖累港股，但壞消息淡化嘅情況下，今日恒指連續第二日守唔住10天線，表現始終有啲令人失望。年初至今，恒指只要進入升市，就一路喺10天線樓上扶搖直上，今次一連兩日守唔住10天線，確認港股未能保持慣常短線升市模式，進入跌市或橫行整固機會，相比升市為高，首個轉弱訊號終於出現了，不可不防。喺呢個情況下，執倉當減持都係可行做法，將手上圖表走勢轉弱股份、或者預想市況好轉時進攻力較弱嘅股份先作出減持，然後繼續持有走勢對辦嘅強勢股，例如內房股、重工股以及受惠人民幣升值嘅紙業股，增加防守力之餘，又可以保留進攻力，冇壞。內房股中，合景泰富（1813）爆響口目標未來3年增長30%至40%，但講緊今年年度化市盈率7倍未夠，雖然股價6日升逾三成，但睇怕繼續有運行。

晉佳

蘋果財經，關心你飯碗
http://fb.com/appledailyatm