【蘋聞追Click】警二代自白：用市民血同尊嚴換來嘅特權我唔想要！
蘋果日報 2019/09/21 00:10
逆權運動警二代
警察子女的身份，在今天是羈絆，是羞惡，還是特權的象徵？中六學生ZZ（化名），在開學前收到同學傳來的圖片，內容大概是開學第一天，同學會以鄙視的眼神望着她。「講真，唔驚係假，但如果真係有人騷擾我，我會強硬啲同佢講：『我都有出去發夢㗎！』如果冇用，我只能講好失望。」9月1日開學至今，她沒有遭起底和杯葛，因為同學都知她曾經走在抗爭前線。警察女兒這身份，卻讓她感到愧疚萬分。「我唔希望有一日同學會起身對我敬禮。呢啲特權，係用市民嘅血同尊嚴換返來，我唔想要。就算係警察子女又點？我都可以有良知。」
活在警權和父權陰霾下
「我曾經喺班上講過老竇係警察，所以嗰班同學會知，但而家當然唔會講，始終唔係咩光采嘅事。」ZZ就讀地區名校，向來外向的她，今年突然安靜起來，書包多了一個父親為她準備的防狼器，「佢會話：『你睇吓你支持嗰啲人話禍必及妻兒，你仲支持佢哋？』我會心諗，其實暴力源頭喺邊？」開學後有同學發起罷課行動，惟需給校方寫家長信，「老竇叫我唔使諗，所以我趁佢哋仲瞓緊偷偷出門，早個幾鐘返學校就係為咗人鏈，我想出一分力。」
3個月以來，ZZ無論在家中和街頭，也要逆權。她是前線滅煙隊，6.12、7.1、機場「和你飛」，也有她的身影。「其實做警察子女發夢，最辛苦係其他人返到屋企就沖涼瞓覺，但我返到屋企係要諗用咩藉口，扮晒精神咁樣，仲要睇吓身上有冇催淚彈嘅味道要洗。」有一次她被警棍打傷，「我估係加咗料嘅警棍，扯咗我啲肉出黎，流到成地血。我返屋企仲要特登買咗個新袋，用來遮住傷疤。」
夜闌人靜，聽到父親執勤完畢回家，她覺得異常難受。「諗起嗰一晚又有咁多人被打，警察又違反人權就難受。我父母見到示威者俾人打到頭破血流，見到警察濫用私刑，甚至有強姦傳言，佢哋係覺得『做得非常好』，我覺得好愧疚，因為阻止唔到佢做呢啲錯事。」
警察父親：出面一定有公安
7.21元朗白衫人無差別攻擊，她尚且希望警察會出來維持治安，但8.31太子站一役，她坦言已對警察沒期望。「我有問過佢7.21警察嘅處理方法，佢答我：『警察都冇辦法，佢哋（市民）見到黑社會唔識走？』我話港鐵唔開車點走？佢答我：『跳軌囉。』嗰刻我覺得唔使再講。」「老竇都有埋怨高層，但佢係怨唔畀升級武力，佢覺得一開始就要鎮壓。」
「記住警察幾錯都好，係警察養大你。」父親用訓斥語氣對ZZ說。最近父母開始看出端倪，着她千萬別參與運動，否則「後果自負」。「老竇話出面一定有公安，我死我事，如果我俾人拉咗，佢唔會保釋我，叫我唔好落佢面。」向來家教嚴的她，父親反對她穿裙子，也不可花錢在買衣服和化妝品上，每天要電話報到。最近更要在母親面前解鎖電話，讓她檢查連登戶口的留言紀錄，「我會叫我哥幫我刪post，同埋會用隱藏應用程式功能，隱藏Telegram，呢個係秘密佢哋唔知。」
發夢帶畀我嘅自由係屋企畀唔到
「6.12係我第一次出去，當時我仲係一個和理非，後尾越走越前；7.1我都有衝入立法會，當時我覺得有一種身份認同，係屋企畀唔到我嘅自由感覺。到林鄭宣佈暫緩，我係覺得，好似做咗啲嘢。」每次發夢完畢，ZZ深怕父親會在電視直播上見到自己，也幻想過兩父女站在戰線對面的畫面。
記者問，如果有一天，香港不再需要分藍黃，你希望跟父親說甚麼？「我會讀返警察誓詞俾佢聽。我希望佢會分黑白，唔係我對警察仲有咩期望，而係我對自細撫養我成人嘅父母，仲有一點點期望。」
記者：程詩敏
攝影：張栢基
攝影：張栢基
中六生ZZ（化名）表示，自己一開始也是和理非，但之後越走越前。張栢基攝
ZZ（化名）在開學前收到同學傳來的圖片，令她擔心自己的安危。