噚晚趁住金管局員工喺馬會送行，新舊總裁率先舉行龍頭棍交接大典。相中所見，任總同攞命陳笑容滿面，雖然照片角度上睇，兩人好似有啲距離感，不過，在現場直擊盛況人士話，兩人其實互有拍膊頭，親和友好，候任主公陳德霖仲講咗兩句，大意話會繼續做好呢份工。
離別在即，任總難得舉家撐場，太座葉小慧，女兒任永欣同好少露面嘅兒子都齊齊現身，金管局就有兩百多名員工參與，高層全部到場，八方聽聞噚晚氣氛溫馨，但亦隱隱然瀰漫依依不捨之情。
繼前晚喺銀行公會及銀行學會餞別晚宴中破天荒開腔，高歌法蘭仙納杜拉名曲《MyWay》（中文譯為《奪標》）後，噚晚任志剛又忍唔住憑歌寄意，再度半獻唱半朗誦呢首「我自求我道」金曲，"Andnow,theendisnear...（現在結局已臨近）Ididitmyway...（我走我的路）"
明年起接替提早退休嘅蔡耀君，出任副總裁嘅金管局「歌王」──現任助理總裁阮國恒，以張學友一曲《祝福》，代表全部人送別老闆。