上禮拜五美股雖然下跌收市，但今日港股都可以睇好啲，美股雖然跌咗落嚟，但已經去到支持位，油價同商品價格跌得咁犀利，通脹數據又改善緊，美股大條道理炒番上去，睇吓花旗嗰邊啲報道，市場已放緊風話對沖基金會棄石油同商品市場，調錢炒美股，唔理真定假，通常出晒口術話要做嘢，個勢又啱啱開始，應該唔會咁快停，美股如果掉頭炒上，亞洲區股市都會照跟，港股班好友仲係話事人，會點做都好容易估。
講多個消息畀大家聽，如果有留意，花旗嗰邊其實喺兩個月前開始，已經煲緊話第2次科網熱潮會喺呢兩年出現，佢哋話無論計cycle（周期）定係計前景，科網股都會帶美股上去，係大升嗰隻，大家可以睇番近排納指點走，應該會有啲啓發。最近有朋友問俊樺好唔好沽晒啲蟹貨轉炒國企股，俊樺答有得諗，但如果有科網股嘅蟹貨，就可以揸多一段時間睇吓先。
國壽（2628）A股明日掛牌，對國企股短期嘅表現有直接影響，呢兩日國壽調整咗咁多，上日出現反彈，今日如果大幅炒上，5行3保會一齊癲，如果國壽唞多1日，咁樣市場嘅焦點就會喺晒國內銀行股上，因為上日收市前掃得好勁。

新地C輪4638：上個禮拜五新地（016）表現令人眼前一亮，單日升6.5%，報收96.2元，睇成交同個勢，應該只係開始，破100元上試105元應該係短期嘅事，新地C輪4638上日報收86仙，槓桿率11.2倍（有效6.7倍），對沖值0.61，正股升上100元，4638應該喺1.08元樓上，正股升上105元，隻輪應該升破1.43元，正股跌穿92元止蝕。
俊　樺