網友爆料:18歲仔忽然「加薪」100倍

蘋果日報 2007/04/30 00:00


捱了一整個月,到月尾打工仔最開心莫過於出糧日子來臨。
Oscar日前出糧後打簿,赫然發覺戶口存款大增,「本來份糧係7,552.05元,點知出咗755,205元。」薪金驟增一百倍,他說,初則高興若狂,後來越想越驚,「始終係不義之財,唔應該袋落袋。」
Oscar自稱只有18歲,咁大個仔銀行戶口未試過有這麼多錢。他說,已通知公司入錯數,公司方面已與銀行善後,「筆錢係無咗,但咁做自己心安理得啲,起碼我曾經擁有過70幾萬,都可以開心吓。」他又說:「如果一時貪心,咁樣坐監好唔值得。」
網友對Oscar這次飛來橫財議論紛紛,多數人讚他做法正確,「如果你用咗筆錢,一定俾人告,乜前途都無晒。」英皇星星說:「你公司個職員最大鑊,咁大筆數都搞錯。」