早前G.E.M.（鄧紫棋）為佢嘅秘撈系列喺新界私人越野賽車場試做越野賽車手，試揸電單車仲揸埋鏟泥車，玩得幾開心。G.E.M.嘅體驗喺YouTube有得睇，不過俾啲網民抽秤佢無牌駕駛。
其實G.E.M.呢次只係坐喺前面做乘客，但就真係有操作、郁動架鏟泥車。有網民猛話佢犯咗法要去坐監，又有網民上載勞工處《地盤工友安全手冊》，列明「負荷物移動的機械裝置」規定：「除非你是有關工作人員，否則切勿在搬土機、挖土機等操作範圍內工作；未經訓練及未得到許可，不准操作機械；如操作叉式起重車、推土機、搬土機、挖掘機、卡車或貨車，更須持有適當的證明書。」

咁G.E.M.有冇犯法呢？馮仁昭噚日問過黃國桐律師，佢話：「邊個控制部車就係邊個駕駛！私人擁有地方但公眾仍然可以入去，法例上係一個公眾地方，唔理揸汽車定鏟泥車，冇適當牌就係無牌駕駛，會罰得好重。」對於被質疑無牌駕駛，G.E.M.透過助手話要進一步了解，暫冇回應。