日產President豪華轎車新世代
近年,日產車廠先後推出多款新車,如Teana、Cube及FairladyZRoadster等等而備受追捧後,廠方亦於日前宣布,推出屬第四代設計嘅President頂級豪華轎車;新車不但造型變得更富吸引力,就連車廂設備配搭嘅豪華程度,更稱得上係同級之冠,不如𠵱家一齊嚟先睹為快啦!
圓渾造型顯現貴氣
呢款屬第四代版本嘅日產President,造型較前變得圓渾流暢,一份豪華轎車嘅韻味油然而生;另外,新車一組頭燈更屬ActiveAdaptiveFront-lightingSystem,可有助提高晚間行車安全度㗎!
4.5V8偈表現出色
新車以一台編號VK45DE嘅4.5公升V8引擎作核心,除引擎動力輸出強勁(馬力280匹,扭力46.0kgm)外,匹配一套5前速半自動波,性能表現絕對毋庸置疑。另外,新車重配有全新氣壓避震組合,不但能提升乘坐舒適性,就連操控表現亦可有明顯嘅改善呢!
■前排椅背能覆摺起,配合舒適嘅後排座椅及闊落車廂空間,能讓乘客可有如置身頭等機艙嘅享受。
車廂布局氣派十足
稱得上係最頂級車系,其車廂配搭一定有番咁上下豪華,就連全新President亦唔例外,車廂空間寬敞闊落唔在講,車內重設有DVD高級影音系統、恒溫冷氣連後排獨立送風等設備之餘,座椅編排亦與上一代型號一樣,前排椅背可覆摺成腿墊,從而令後排乘客可有頗佳嘅乘坐享受呢!
■新車以一台4.5公升V8偈作動力核心,280匹輸出絕能予人十足信心。