梁小冰早排同《鹿鼎記》陳少霞、劉玉翠、陳安琪、鄺文珣成班韋小寶老婆聚舊，個個好似食咗「防腐劑」咁，個樣冇變!身為90年港姐季軍嘅小冰，噚晚同喺美國返香港嘅90年港姐亞軍翁杏蘭以及港姐第五名姚康莉食飯見面，小冰將當年選港姐嘅珍藏相，po埋出嚟懷念一番，留言話：「今晚好開心好開心好開心。同屆港姐亞軍翁杏蘭由美國回港相約我同姚康莉食飯，大家相識二十七年，由十九、二十歲少女變成o依家美艷少婦，話題滔滔不絕，講到雞啄唔斷。大家還記得翁杏蘭的招牌笑容和可愛的兔仔牙嗎？」

《蘋果》今日聯絡小冰，講到呢個開心飯局，佢透過短訊話：「我哋嗰一屆感情好好，呢二十七年嚟一直keep住相聚，吃喝玩樂旅行都一齊，不過佢哋唔係呢行，想低調啲，所以唔會成日post相。三個女人一個墟，乜嘢都傾餐飽，仲計劃下次一齊去旅行。翁翁雖然係鬼妹仔，不過次次返香港都要食中國菜，噚晚就叫咗隻北京片皮鴨俾佢食，仲有一大碟叉燒。」

問到點解唔約埋當年冠軍袁詠儀(Anita)一齊時，小冰話：「我同Anita比較忙，好難約埋一齊，舊年佢哋相聚，仲一齊出席電影首映，我有嘢做就去唔到，大前年就Anita有嘢做嚟唔到，我哋就靠視像電話傾偈。」(新聞連結： http://bit.ly/2xo6nWJ )

真係友誼第一，比賽第二。咁1990年呢屆港姐確係比較齊心，之前梁小冰同陳法蓉因為一件外套，引發「慧妍之亂」，事後袁詠儀撐同屆港姐梁小冰，小冰唔係一個用是非做新聞嘅人，作為朋友一定支持佢，又話以自己所認識嘅小冰，如果唔係受到好大傷害，一定唔會有呢個反應(新聞連結： http://bit.ly/2gJ44Cj )，可見感情深厚。