【更新資料：楊明綸要睇醫生】

今午（11日）沙田日馬，梁家俊於第九場三班1400米夥拍蘇偉賢馬房「經典帝國」後上勝出，單Win及組合獨贏A3分別派95及23.5元。

五歲馬「經典帝國」同華人騎師特別啱key，至今四次贏馬中，近三次均由華將策騎跑谷草或田草，本身季內累積兩捷，今季暫九戰兩勝兩位，表現可謂實而不華。今場「經典帝國」取勝亦算有運，事關兩騎師連環墮馬，空馬「軍勇戰略」（墮馬前由蘇狄雄騎着）直路橫掃千軍，「經典帝國」一早走甩完全冇受影響，否則好似大熱門「帝豪寶寶」咁，俾「軍勇戰略」一夾隨時連位置都不保。

第九場二至四名分別為「好力煌」、「新力威」及「人強馬勁」，四重彩派23萬幾。

至於策「勝利日」墮馬之楊明綸，可幸完全冇事，楊明綸可自己步返，其評馬人女友莎拉非常緊張，立刻走到跑道旁了解情況，當知道楊明綸無大礙後，即笑晒口並攬住綸仔，十分恩愛。後來楊明綸感到大腿痛楚，去睇醫生接受詳細檢查。