去年播出嘅神劇《太陽的後裔》大受歡迎，男女主角宋仲基、宋慧喬嘅「雙宋情侶」亦獲大批劇迷支持，有唔少劇迷都希望兩人戲假情真，甚至多次傳出撻着，不過雙方都否認戀情。日前有網民捕獲到雙宋前後腳離開印尼峇里島，據知宋仲基於13號離開，喬妹則留到上周五(16號)先離開，兩人前後腳離開峇里只差3日，令雙宋再次傳出戀情。

緋聞爆出後，雙宋一直未有回應，直到今日兩人先透過所屬事務所否認拍拖一說。喬妹方面表示：「喬妹去峇里係為咗宣傳出道20周年寫真集『 MOMENT』，係同工作人員同行，亦冇見過宋仲基，之後都會去其他地方宣傳。」而宋仲基方面則指宋仲基去峇里係私人行程：「宋仲基宣傳新片《軍艦島》前同朋友到峇里旅遊，唔知宋慧喬亦喺峇里，與宋慧喬亦不是咩特別關係。」