花旗股市果然唔曳，跌咗1日又掃番轉頭，再次逼近13400關，格林斯潘重提經濟衰退，影響力已大不如前，符合咗宇宙規律，離開呼風喚雨嘅日子越耐，影響力越細。
美股咁勇猛，今日亞洲股市都唔會失禮，港股上禮拜五俾美股拖低咗，今日應該可以做番齣好戲，追番跌咗嗰兩百幾點應該冇問題，睇得咁樂觀，梗係唔係靠美股反彈咁簡單，QDII政策有改動，准買港股，你話好友唔挾班淡友就勢係假，滙控（005）同中移動（941）兩隻龍頭股喺美國嘅ADR都升超過3元，你話今朝港股會點？至於新政策對港股嘅實際幫助有幾大，仲要進一步觀察同評估，但係挾番一轉上去應該冇走雞。

中旅C輪7423：中旅（308）呢幾個月走勢都幾反覆，但大勢就仲係向上，街邊煲佢有料到都煲得幾行，睇番近日嘅走勢同成交，都幾似要做嘢，上禮拜五升上3.66元，有壓價嘅手影，但係都好似㩒唔住，隨時上破4元炒上4.50元。
睇好中旅，可以買啲中旅C輪7423，上日收1.05元，槓桿率3.5倍（有效2.2倍），正股升上4元同4.50元，隻輪應該喺1.28元同1.63元樓上，正股跌穿3.40元止蝕。