【爆相爆片】75歲前警司陳欣健坐輪椅現身醫院 稱有「三高」否認心臟出問題
蘋果日報 2020/09/14 08:20
現年75歲的陳欣健，入娛樂圈前是皇家香港警察警司，向來高調支持警隊，去年孖住梁家輝一齊出席撐警集會，又曾就7.21元朗襲擊事件，在facebook出po暗嘲抗爭者：「喜歡就唾罵警察，有事就催促警察，這心態很難理解。」而陳欣健演出的角色，絕大部份都是警察，他在3年前拍攝最後一部網劇《反黑》飾演張Sir一角，鏡頭前神勇無比，但原來最近身體卻出現毛病，昨日被影到要坐輪椅入院檢查。
昨日《蘋果》讀者Ken透過「爆相爆片」透露，在銅鑼灣聖保祿醫院的門診部見到陳欣健坐在輪椅上，似要等候入院。上午11時許，陳欣健穿上連帽衛衣配cap帽和口罩，坐在輪椅上，與在旁的男友人傾偈。讀者Ken表示隱約聽到兩人的談話內容是關於心臟問題，他說：「好似話因為個心有事要入院，話等緊做心電圖。」
之後記者抵達醫院，陳欣健禮貌表示不想拍照，並說：「我要化妝靚仔啲先得，唔想呢個樣（病容）見人。」問到是否心臟出問題？他說：「量度血壓之嘛，我之前檢查過，但我想問吓醫生點樣保持血壓，因為本身有三高（高血壓、高血脂、高血糖）。」他透露經朋友介紹一位醫生，故到醫院再作檢查，他說：「因為朋友認識個醫生，我住港島，呢邊（醫院）就唔使走嚟走去。」
再被問心臟有沒有出現問題？他說：「冇嘅，但要check住。」而3年前在網劇《反黑》中飾演張Sir的陳欣健，續集因疫情延遲，問到可知幾時開工？他說：「有排呀，陳惠敏又病咗，要等囉。」及後陳欣健在電話補充，指要在醫院住一晚，無奈地說：「原來要聽日先有得body check，仲要開會，但都冇辦法。」
陳欣健要坐在輪椅上，被讀者隱約聽到要照心電圖。（蘋果日報）
陳欣健直言未化妝不想上鏡。（Facebook圖片）
陳欣健未入行前是皇家香港警察警司。（互聯網圖片）
去年7.21元朗襲擊事件，陳欣健力撐警方。（Facebook圖片）
陳欣健自爆有三高問題。（資料圖片）
阿叻和陳欣健都是撐警之星。（資料圖片）
（Facebook圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！