【記者白琳報道】他們天生被視為弱者，雖然手腳無力、寸步難行，卻可變走杯子裏的紅波、從捲起的報紙中倒出金魚來。「我做到嘅嘢，人哋做唔到，係一種自豪」，他們是甘迺迪中心的中四殘疾學生，參加了魔術學會，變出自信和視野，真有其事，不是掩眼法。

「擴闊到我嘅世界」

仁鉻患有大腦麻痹症，不能做穿珠仔等細微動作，卻會變啤牌或還原穿窿的銀紙，「社會好多人以為我哋好容易跌親，係需要照顧嘅人，我想借魔術話畀佢哋聽，我唔係。」寶麒患上相同病症，以前終日無所事事，學習魔術令他有人生目標，「我知道練多啲，就會完美啲。」
阿豐患有肌肉萎縮症，12歲開始坐輪椅，他的世界從此變得很小，「魔術擴闊到我嘅世界，表演嘅時候人哋注意力集中喺我度，會走嚟同我傾偈。」
創辦魔術學會的數學科老師陸子民說，希望學生透過魔術表演與外界接觸，「唔好成日困響港島西面，做井底之蛙。」魔術師Harry哥哥說，魔術令人好奇，學生有學習動力，從而提升自信，「學生要從魔術中學習，知道失敗唔係bigdeal（大件事）。」