煲碟王：
《師奶殺手》賭場劫匪智鬥黑人肥媽
蘋果日報 2004/09/12 08:00
售價︰$168
音效︰AC-3
發行︰洲立
當初喺戲院睇過《師奶殺手》嘅預告片，知道在港唔收得已屬意料中事。從《末路驕陽》、《捉智雙雄》票房已見，港人並非盲目追捧湯漢斯。冇《雷霆救兵》嘅壯烈、《劫後重生》嘅感動，起碼都畀番《緣份的天空》、《網上情緣》嘅冧人古仔我吖。《師奶殺手》就係衰在太過胡鬧，又唔似《阿甘正傳》咁笑中有淚，Fans睇前必要有所覺悟，但求一笑無妨。
放低心理包袱，開始睇《師奶殺手》DVD，當正一套B級笑片睇，發覺又唔係咁差喎。劇情簡單，講以湯為首嘅打劫集團，租住一黑人肥媽（IrmaP.Hall飾）嘅地下室，諗住挖條隧道去賭場金庫，點知波折重重，見招拆招嘅湯引發連串笑料，基本上可算係搞笑版《OceanEleven》。
跟湯有最多對手戲嘅，就係飾演包租婆孟太太嘅黑人肥媽，表面上惡到死，心底裏其實對死去丈夫有情有義，重係一個虔誠教徒㖭。本來胡里胡塗，多番留難一班大賊，喜劇節奏感應可大幅提升，奈何肥媽賣相一啲都唔可愛，一味專制、惡死，若然換上更搞笑嘅胡比高拔，相信效果將好得多。最遺憾係中文字幕跟《月曆女郎》出現同一弊病，繙譯以台灣為主，明明五蚊美金支票譯做二百蚊、窩夫就咁叫做蛋餅等，平白錯失唔少過癮情節。
要搞笑，班大賊組合一定要夠騎呢。全片最正常算係湯飾嘅首領，滿肚墨水，兼且隨時念得一首古文詩，肥媽及一班師奶冧到死。其他成員就真係各有「特色」，由《搞乜鬼奪命雜作》黑人MarlonWayans飾演嘅MacSam最搞笑，成日拎住支槍嚇鬼，畀賭場經理炒魷後又要死死地氣認衰仔。本來最期待《熱血最強》中飾演欖球隊長嘅RyanHurst表現，可惜片中講佢四肢發達頭腦簡單，成套戲好似白癡仔咁，難明湯會揀佢做隊員。最失敗係爆破專家，因患上腸燥炎，每每喺重要關頭急需「開大」，笑料係有，略嫌有啲低俗啫。
特別收錄內容唔算多，都係導演訪問、蝦碌鏡頭呢啲基本大路嘢，唯一較可取係收錄咗戲中兩首旋律優美嘅詩歌，包括《ShineOnMe》及《TroubleofThisWorld》，以全首足本唱番出嚟，就算唔係教徒，相信都會聽出耳油。