當年今日
關於我們

【波鞋山】周柏豪收品牌贊助影完即放 收錢加多一倍捐慈善機構

蘋果日報 2018/12/18 00:00


生活於香港急促大都市中,為三餐而日忙夜忙,忽視與家人相處時光,當中有幾多人能明白「仍能共你見面尚餘下幾多次」的道理。用字簡單而道理深遠,正如為事業而拼搏的周柏豪,踏入34歲後越來越對「老少平安」有更深體會,他深明只要家人朋友平安健康,能聚首見面便是自己最大福份。
聽到別人送上一句傳統祝福語「老少平安」,便有種暖在心感覺,周柏豪將這份祝福化作歌曲。日前拜訪位於長沙灣一間社企開設餐廳,跟廚師學做一道家常菜「老少平安」。柏豪在洪師傅指導下先將豆腐搓爛,再加入鯪魚肉、果皮、胡椒粉及麻油,再將材料鋪平在碟上,放入蒸爐蒸熟。出爐後再加上蔥花、豉油,最後淋上熟油。
柏豪從廚房捧出一份熱辣辣的「心意」出舖面,跟餐廳打理人宋太及一眾員工品嚐,令大家食指大動。柏豪敬佩宋太為了患有自閉症的愛女Flora而付出,辭去穩定工作而開辦餐廳,並聘用殘疾人士為大部份員工,務求令愛女及同樣遭遇的人能學到一技之長,以助將來投身社會。跟宋太傾談餐廳面對的困難後,柏豪逐一跟員工合照留念,寫下「好人,好餐廳 繼續努力,加油!」字句作為鼓勵。
細味歌詞,柏豪坦言人越大越去追求簡單實在生活,身邊人的健康快樂便是最重要,正如歌詞指每次與家人朋友見面,便是少了一次機會,他說:「如果每個月同屋企人見一、兩次,一年只係見到十幾、廿次,再講就唔想講,當所有嘢有數得計時,自己同身邊人都會好好去珍惜見多啲,製造多啲開心美好回憶。」
家常便飯是一家人共享天倫時光,柏豪相信這個年代應該好少家庭能夠做到,一來是居住環境限制,二來是工作時間難以配合,他慶幸說:「我有種能夠聚集屋企人能力,大家都好錫我,覺得我好難見面,當我喺屋企群組講我聽日放假,大家留個期畀我,就會約到食飯,或者出去飲茶。」每次回家吃飯,柏豪父母都會問他最想吃甚麼,柏豪露出幸福笑容:「我外母煮飯好叻,每次我老婆都話如臨大敵,但外母就好開心,因為有人識欣賞,人大咗更享受屋企食飯,傾吓偈,食完飯睇吓電視,同小朋友玩吓,食吓生果。」所做的雖然簡單,但柏豪覺得是人生最開心的事,正因為一家能齊齊整整聚首一堂。
社會上不少人以生命影響生命,正如宋太一樣,柏豪指日常物質上如波鞋、服飾都獲得不少品牌贊助,他說:「坦白講我都用唔完,甚至乎會堆積成一座山,影響屋企環境,所以我每隔一、兩個月,將啲嘢影咗先,完成嗰部份工作,然後就會賣畀啲朋友,會係一個好相宜價錢,例如佢用300蚊買咗對鞋,我收到錢之後會加多300蚊,再捐畀啲慈善機構。」雖然是私下去行動,但柏豪認為此舉是贊助品牌、朋友及自己去成就一件有意義的事,既不浪費又能幫助有需要的人,原來不少朋友更以高出原本定價去買,柏豪更樂意以高出的金額捐給慈善機構。
柏豪媽咪平日也熱衷義工活動,不時跟朋友組織義工團探訪老人家,為他們打掃屋企。作為子女,柏豪自言非常感動,每次媽咪分享義工經歷時,自己亦從中有所得着。早前跟歌迷的聚會移師到錦田大樹下舉行,他說:「當日叫歌迷放低電話,用眼用心去做義工工作,幫動物沖涼、餵食嘢同陪動物玩,正正係想為呢個機構做嘢,因為大樹下係好需要經費同義工去幫手,希望再有機會再去。」柏豪有想過成立慈善基金,但礙於對相關事項認識不多,又未有一個好好單位幫手運作,但相信未來有成立可能性,因為可以幫助更多有需要的人。
採訪:馬建華
影片:廖達燊、葉君海
場地提供:喜樂餐飲教室
精選娛聞,喺晒《娛果》
http://fb.com/appledailyent
empty
柏豪敬佩宋太為了患有自閉症的愛女Flora而付出
empty
周柏豪跟廚師學做一道家常菜「老少平安」
empty
柏豪坦言人越大越去追求簡單實在生活
empty
周柏豪寫下「好人,好餐廳 繼續努力,加油﹗」字句作為鼓勵。