九一一影響馬主 - 左丁山

蘋果日報 2002/07/12 00:00


馬季結束,新馬季未至,七月正是馬主為愛駒買保險之時。
今年買保險大件事咯,保險公司話受到九一一影響,賠償慘重,乜保險都要到期續保就加價。香港的汽車保險、勞工保險已經貴到飛起,令老友記萬事德牙痛咁聲,想唔到賽馬保險亦大幅度增加保費,啲馬主想唔牙痛咁聲都幾難。
馬主H接到「多福保險顧問保險有限公司」嘅保險到期通知書,「馬匹死亡險」(mortalityrisk)要百分之三點八五,「失去競賽能力險」(lossofuserisk)要百分之四點五,直情食人隻車。翻查舊紀錄,去年嘅「死亡險」係百分之二點八,一隻價值一百萬元嘅馬,去年交開二萬八千蚊保險,今年就要三萬八千五,增加百分之三十七點五,增幅驚人。馬主協會同「多福」(Storefield)交涉無效,屬下會員惟有引頸就戮,如果你有一匹好馬,點敢唔買保險呀。
左丁山以前講過,九一一事件雖然話影響美國為主,其實恐怖活動對全世界都有影響,人類在各方面都為人與人之間嘅仇恨付出代價。講得唔好聽,就係中東回教激烈分子與以色列、猶太人以及以色列大佬──美國有仇,打起交嚟,所有其他人都一齊受害。
冇法喇,馬主H一路媽,一路寫支票,這年頭,百物通縮,惟有馬主嘅養馬費用,有加無減,虛名嘅代價甚大。