高鐵「割地兩檢」早前在爭議聲中通過，今日舉行開通儀式，上年已作咗首新歌《小明搭高鐵》幫政府hardsell嘅兒科醫生李家仁，今日真係有得搭上廣州喇！

李家仁一直認為一地兩檢冇咩問題，好早已經話方便同舒服最重要。佢今日以嘉賓身份出席儀式，打咗條有佢嘜頭嘅呔，掛住個證件，八方細心一睇，原來證件連埋去廣州南嘅車飛。李家仁去到西九站，就急不及待拎住自拍棍，不停自拍，心情似乎好興奮。佢7年前首《小明上廣州》歌詞已經提到「搭高鐵、樂悠悠」，而《小明搭高鐵》當然再吹噓高鐵點好啦，歌詞包括「去北京識得選擇搭高鐵」、「一地兩檢 靈活措施利市民 高鐵開路 連繫各方搞好經濟」、「一路向北 沿路線歡樂旅遊 一帶一路 齊共你祝福新中國」。

其實唔少嘉賓都係咁喺西九站內自拍，商經局局長邱騰華、一眾行會成員等等都有。日前公開鬧法官而被娥特批評嘅工聯會港區人大代表吳秋北，亦有到場，佢就同黨友陸頌雄自拍。

立會補選新聞，《蘋果》一網睇晒：
http://bit.ly/appledaily1125