大家總有幾個麻甩佬約踢波嘅群組，但想約腳成功又唔會咁易無疾而終的話，就要學網上熱傳嘅溫馨WhatsApp群組心得一樣，集齊以下嘅各款成員！

1領導人：要有一個長期服務嘅admin。會隨口約踢波嘅好多，夠膽開group嘅先係有承擔嘅真男人！

2萬人迷：要有幾個風姿不減當年嘅萬人迷。最好波嗰幾個話去通常都會吸引到多啲人去，但通常都以為好波嘅係自己。

3妄想狂：要有幾名不甘老去嘅世俗憤青。唔少中年漢不嬲覺得自己天生異稟，但硬係未發揮到出嚟啫，所以總係好熱情參與。

4「弗」佬：要有幾個keep「弗」專家。就係唔知點解一把年紀都仍然童顏兼fit到暈嘅猛男，鍾意周不時send下啲修身小貼士同勵志小金句。

5最佳損友：要有幾個得閒無事互相抽水嘅老友。總係有啲冤家經常互窒，搞旺個場，偏偏佢哋又係最friend嘅。

6Gag王：要有幾個懶幽默嘅疑似思想家。因為幽默感可以減少反面機會，同埋容易啲接受長期輸波嘅命運。

7臥底：要有掌握各種小道消息嘅「內部」人士。包括識人買場、黐場嘅靈通人士，以及同對手起底嘅臥底。

8鹹蟲：要有幾個講黃色笑話嘅奇才。唔駛奇才，因為其實個個麻甩都係。

9早更：要有幾個經常值夜班同比公雞起得還早嘅失眠者。主要職責就係負責晨早上網book場，同埋morningcall各位起身出發踢早餐波。

10故佬：要有幾個記憶力超強嘅大腦。響大家生活忙碌或者心情低落嘅時候，專講番以前嘅威水史。

11作家：最好仲要有幾個文人。可以響賽後寫番幾句感嘆人生苦短但好在有波踢嘅post嚟呃like用。

12廢中青：要有一位甘願經常比人欺凌嘅對象。未必係最屎波果個，而係一碼打飛機嗰位，雖然通常係同一個人。

13虛擬玩家：要有一位經常身在海外，心繫本群組嘅時差小子。就係永遠唔會出現但永遠話好想嚟個條虛擬朋友。

14食家：仲要有群眾飯醉領袖。佢最關心其實唔係踢波，而係踢完之後去邊間食飯隊啤同吹水。

15好隊友：最後要有幾個一言不發，寧願潛水浸死亦唔退出群組的基礎組員。佢哋永遠唔會提議任何嘢，但永遠第一個支持任何動議，呢款隊友先最抵錫。

文：Keyman（節目主持）