當年今日

智取大市:那些年跌錢的股 - 晉佳

蘋果日報 2018/05/25 00:00


炒風一轉,近期突然變咗細價股嘅世界,過往令唔少散戶付出沉重代價嘅阿里系同騰訊系細價股,齊齊起飛,阿里影業(1060)、華誼騰訊(419)、阿里健康(241)、華南城(1668)單日一度炒高一成以上,呢啲那些年唔少人都跌過錢嘅伏股,今時今日一齊炒起,唔知有幾多人仲敢博。
近排另一個現象,個棚夠疏嘅股表現特別好,頤海國際(1579)同江南布衣(3306),以至一眾強勢教育股都係,所以當教育股起晒棚等你買嘅時候,反而就有點兒戒心了,有貨不妨逢高食糊。北水近期越嚟越活躍,只不過買嘅對象唔同咗咁解。
重工股近期表現理想,龍工(3339)近排突破4蚊阻力,成交活躍咗,波幅大咗,睇3、4月內地挖掘機械產品銷量按年升八成就知利害。
中國重汽(3808)亦唔輸蝕,首4個月重卡銷量按年增長三成,行業整體亦出現復蘇。佢舊年盈利爆升超過4倍,如果今年跟隨重工行業保持銷量增長,喺經營槓桿偏高之下,市盈率或變為更低單位數,復蘇股嚟講確係吸引,緊隨龍工之後,破頂相信只係時間問題。

晉佳
http://fb.com/advanceguy1
本欄逢周一、三、五刊出