鬼報報道,話國寶松買車瞞稅案,律政司問過五個獨立法律意見,結果有四個都認為,控告阿松貪污,證據不足,特區政府勝算不足。
之不過,原來內情唔止咁少。有消息人士指出,鬼報嘅報道有技術上嘅錯誤,話告唔入阿松嘅,冇五比四咁壓倒性,而只係問過一個法律權威,就係退休大法官祈禮富。
本來,做律政司嘅詩姑諗住收手,橫掂阿松都已經落台,身未敗而名裂,既然鬼佬司法權威都話告唔入,政府就無謂浪費公帑,就此算數。
嘿,點知,喺行政會議之中,有某親中高人,好高瞻遠矚咁建議:既然估計告唔入,不如借阿松個人頭一用,點都由政府高調告一告先,挽回阿董極度低迷嘅民望都好。
政務司司長煲呔曾頭腦清醒,或者覺得咁實在太離譜,即時反對,話香港係法治社會,法律意見話無謂告,政府就應該慳番公帑,點解要咁政治化?
雙方角力,重未有結果,不過就令人幾好笑。估唔到最後最有力趕絕阿松嘅,唔係民主派,亦唔係香港人,而係阿董身邊嘅親中有力人物,真係枉阿松讀大學就已經火紅年代,開始愛國。反轉豬肚,政治真係好辣手無情。審計署報告話呢個政府浪費公帑,明知告阿松唔入,為咗救阿董,若然係都要使幾百萬,將阿松嘅身軀化為一隻政治沐浴露,滴落沖涼缸,同阿董洗白白,唔怪得財赤咁高。阿松要唔要過堂,就睇吓呢位高人,有冇力拗贏手瓜咯。
傳真︰2623-9278
電郵︰
pf_le[email protected]