要數最多難馴服球員嘅英超聯球隊，紐卡素都算數一數二。繼前領隊卜比笠臣先後同舒利亞及比拿美等「針鋒相對」、怒賣蘇蘭奴、真拿斯又唔聽指示去射十二碼之後，新任領隊桑拿士上任冇耐，亦領教過比拿美嘅「投訴」。
最新一輪「舌戰」又嚟自法國左翼羅拔，內容嚟嚟去去都係話不忿冇正選踢。
可能大家對「紐記」球員嘅扭計新聞，都已經有厭煩感覺；桑拿士呢邊重未見有咩回應，只係話想執好啲個後防；換言之攻優於守嘅羅拔，呢個時間又嘈嘈閉，前景都難樂觀咯。
其實羅拔呢個時間盡訴心中情都係好㗎，起碼博到一月轉會期走人；如果遲啲至嘈，可能要等到季尾至走得！

信基瑾去德國醫腿雷拿至怕學活基治
曼城嘅美國中場雷拿大腿舊患翻發，曼城送佢過德國醫，而佢哋領隊基瑾重話德國佬醫呢種傷有一手，可以幫雷拿斷尾。之但係，𠵱家喺美國醫緊大腿嘅皇馬英格蘭中堅活基治講過，如果冇畀德國佬醫過，今日就唔會搞成咁，遲遲都返唔到球場比賽。我求大俠勸基瑾咪咁老定。

叫拉科搵同胞接班莫路施華巴西典範
拉科魯尼亞位老將中場莫路施華，都算巴西球員一代典範；目前雖已三十六歲，但呢兩年喺西甲聯甚至歐冠盃，都仍然有唔錯表現。一般相信呢位前巴西國腳中場，踢埋今季都接近退休，最近佢建議拉科搵番個巴西仔做佢接班人，退休都不忘關照吓啲同胞，我求大俠都好欣賞。