當年今日
關於我們

二十年前 - 左丁山

蘋果日報 2009/06/04 00:00


二十年前五月中,住在北京著名長城飯店,遇到開台只有幾年嘅CNN嘅工作人員,見咗幾次面,互相傾談之下,問一位記者MikeChinoy做乜事要在北京直播天安門,Mike話:「學生靜坐示威,在共產國家極為罕見,應有大事發生,我哋一定要守住等候,不能錯過大新聞。」後來果然有大新聞,MikeChinoy成為CNN嘅記者、中國北韓專家,現已返回美國,離開CNN咯。
中貿林問:「記唔記得當年遊天安門,似睇嘉年會?」當然記得,中貿林與法國C夫婦係北京通,帶住左丁山周圍行,見到大量外省學生上京,打鑼打鼓操入天安門,各國營機構、新聞機構日日有員工上街到天安門支援學生,左丁山日間談判注資一間北京連鎖餐廳,晚上跟中貿林去天安門「觀光」,大家都唔察覺到大禍將至。中貿林與一班香港記者經常見面,其中一位記者C駐京個幾月,由報導胡耀邦去世開始,每晚出現熒光幕前,父母在香港睇電視,每日驚多啲,一味催佢回港,卒之在六月四日之前,電視台召佢回港休息一陣,鎮壓清場隨之而來,記者C在電視機前大哭,一哭自己錯過一生最大新聞,忙碌個幾月,突然錯過了最後最重要時刻,係專業記者畢生之痛;二哭學生何辜,竟遭殘殺。八九年六月四日晚,守在電視機前徹夜不眠,相擁痛哭之香港市民,何止一百萬,包括左丁山一家人在內。
眨眼二十年,如華叔所言,不敢回憶,不能忘記,當時所有香港報紙刊登大量廣告,支持學生,反對鎮壓,不少今日政壇大人物,愛國人士,皆有聯署廣告,物證仍在,誰也不能否認,去年進入大學之新鮮人,今年啱啱二十歲,佢哋如果肯到大學圖書館翻查八九年所有香港報紙,當上一課通識教育,會有莫大益處。
中貿林話想搵番二十年前同佢相熟嘅記者見面食餐飯,問有冇辦法。剛好六月號《信報月刊》有廖美香(六十四位採訪天安門記者之一)文章,詳細紀錄每一位當年六四記者之去向,名單齊全,中貿林大可按圖索驥,請記者C聯絡番幾位相熟嘅,搞一次重逢晚飯。忽然間想起法國C夫婦,多年不見,不知近況如何,當年佢曾經斥資買麪包送去天安門派,義風可感也。