【動畫‧追過Kelly鍾嘉欣】林夏薇才俊老公媾33E o靚模?
林峯鍾嘉欣陳慧琳林夏薇莫贊生朱昱潾
現年29歲嘅林峯堂妹林夏薇自從同拍拖兩年嘅45歲才俊莫贊生(Jason)結婚後,即過住少奶奶嘅生活,鍾意接job就接,鍾意拍劇就拍,認真夠幸福,日前出海仲大晒噴血寫真,今日有周刊爆,原來老公Jason未同林夏薇一齊之前,曾經同Donut前成員Caroline(朱昱潾)拍過拖三年,Jason更出錢力捧對方。
據報道講,Jason係白手興家,喺美國讀大學時,識到香港一啲富二代,幾年前佢就幫一位百億富家大小姐打工,買咗大批facebook尚未上市嘅股票為呢位大小姐賺咗唔少,之後搞地產、借貸等,後嚟身家賺到過億,同林夏薇完全唔同,林夏薇喺廈門家族顯赫,伯父林華國有「廈門首富」之稱。
報道又指,Jason喺未識林夏薇前,曾經追過陳慧琳、鍾嘉欣,不過都追唔到。而Jason又同Donut前成員「河南長腿劉心悠」Caroline喺友人聚會上認識,Jason好鍾意Caroline,以「銀彈」討伊人歡心,仲同Caroline住喺西貢御花園獨立屋,又送mini cooper畀Caroline ,又曾暗地出錢搵人捧Caroline,有指最終係Jason逼婚,令Caroline提出分手,失戀後,Jason三年前喺生日派對識到林夏薇,當時二人火速撻着,男方亦對林夏薇一心一意。
此外,報道又爆Jason所養「金珠」係當年Jason同Caroline所養,有傳林夏薇似乎唔知呢件事,仲成日攬住呢隻「訂情狗」影相。