每當港人外遊有意外，傳媒都會急call旅遊業議會總幹事董耀中查詢情況，反而好少接觸旅遊業議會主席何栢霆，八方上星期同行家到澳門採訪，何主席都有到，擇日不如撞日，大家相約喺coffeeshop夜話。
唔傾猶自可，一開聲先知何栢霆原來口若懸河，佢一邊飲紅酒一邊講旅遊業八卦，又話要增加議會運作透明度，講足兩個鐘頭。酒後吐真言，講到新任旅遊界立法會議員謝偉俊，何栢霆忍唔住唉咗一聲，呢一聲嘆息可圈可點，佢話擔心謝生對旅遊界認識不足，幫唔到業界咁話。
何栢霆支持嘅董耀中落選，估唔到佢仍然耿耿於懷，董耀中早前停薪留職參選，何栢霆透露議會聽日會討論董耀中辭職申請，可能會作挽留，「我就梗係想留佢啦，佢參選時，我代佢兩個月回覆傳媒，頂唔順呀。」