泰國政治局勢回穩,香港人梗係趁假期去曼谷玩兼做spa嘆世界,但費清收到讀者報料話「泰」危險。九十後背包客Vivian上月底去咗Discovery Channel報道而爆紅嘅美功鐵道市場,睇住火車軌兩旁擺滿攤檔,當火車經過時,攤販會極速拆晒帳棚,同火車擦身而過。Vivian同朋友影相期間,火車急速駛過,對面一位遊客避唔切就被捲入車底,一隻鞋飛脫。
Vivian嘅朋友拍低事發一幕,佢話自己唔敢睇片段,傷者事後被抬離現場。Vivian想提醒大家當地冇任何安全提示,叫遊客企喺邊度先安全,希望各位背包客小心至上。常居泰國嘅港人胡慧沖就話,鐵道市場係泰國平民搵食餬口嘅地方,唔係官方認可旅遊點,遊客見當地古靈精怪就湧去睇,好易樂極生悲,佢就唔建議大家去睇熱鬧。
Vivian事後翻查泰國傳媒報道,想知傷者情況,但就搵唔到火車撞人意外。胡慧沖話唔出奇,因為泰國有七十七個府,如果傳媒去唔切現場跟進,外界就以為乜事都冇發生過。佢自己都冇聽過新聞報道講鐵道市場發生意外。除咗鐵道市場外,佢又提醒大家同野生動物接觸要小心啲,騎大象好似好過癮,但亦發生過大象發癲,將遊客揈落地。新年旅遊旺季又嚟,老套都要講句最緊要平安!
費清 #要生計,也要生活#毋忘初衷