招積域：喂，踢狼隊嗰個南韓國腳前鋒薛咩咩轉會去雷丁喎，原來佢都值100萬鎊！
菠蘿文：你連人哋名都唔識，佢叫薛琦鉉呀，但點諗都唔覺得佢值100萬鎊。侍仔，你又點睇呀，你女友識唔識佢？
侍仔：我女友話覺得薛琦鉉名大於實，見佢以前踢狼隊都唔係突出嗰隻，入波唔多，踢國家隊都係後備居多。或者踢過世界盃身價高些少，你打FM都係啦，2打6踢過世盃，身價都會不合情理地上漲。
招積域：希望雷丁入啱貨啦，佢哋唔多錢，又話要加門票價錢維皮，如果入流嘢就……
侍仔：想睇低組別聯賽好困難，得一間收費台有得播，仲要只係播大戰，想睇其他隊都只係可以喺足總盃度睇一場半場。
招積域：最多咪睇網上面消息當軍情，未見過佢哋踢，又點知球員表現係點？
菠蘿文：有好嘢唔睇睇次貨？4大聯賽都睇唔晒啦，做咩事要睇低水平賽事呢？為自己賭錢定係多時間得滯？我就唔會花時間鑽研次等聯賽喇。