早前發生「人block」事件，朋友呢幾日議論紛紛、各有己見。
時間：90年代初。
地點：觀塘。
背景：葉繼歡揸住支AK47行街街……
人物：路人甲、差佬乙。
乙（跪地指住甲）：你你你，過來。
甲：咩事阿sir。好驚呀！
乙（指住乙與葉之間嘅行人路）：我要查你身份證，你企定喺度唔好郁，郁就拉你阻差辦公。
有人話鄧竟成係飛虎出身，只得四肢發達，我就話佢有諸葛孔明嘅智慧。因古有草船借箭，今有roadblock搶車。
今時今日啲花旗國金融機構嘅命途，真係有人今朝要執笠，又有人漏夜賺大錢。孫柏文睇高盛業績，係好勁。咁呢邊廂高盛勁時，個邊廂就有CIT就死得。金融機構輸錢唔使死，要去到執笠田地，永遠都係馬多夫個隻，即係好多個煲水滾，不過唔夠煲蓋。