新地（016）家族兄弟內訌，郭老太鄺肖卿5月走馬上任公司主席兼非執董，鎮住江山。早排市場傳聞郭老太只會做到年底，二仔炳江即刻出嚟澄清，話冇聽聞阿媽唔do，三仔炳聯仲力撐阿媽會繼續做主席。係真唔係，答案噚日揭盅！
新地通告披露，郭老太會喺12月嘅股東大會告退，但就符合資格兼願意連任。雖然話要得到股東投票通過，但相信有郭老太坐鎮做主席穩定軍心，冇乜邊個股東會sayno。
噚日新地刊發郭老太做主席以嚟首份年報，華華梗要第一時間拜讀，本年報仲登咗幾張郭老太嘅靚相，咁即係話畀大家知，佢老人家唔只係做個掛名主席，仲好積極參與新地業務。至於被「貶」為非執董嘅大仔炳湘，華華揭嚟揭去都搵唔到佢幅玉照。

284萬人工多過細佬

講完權梗要講金，三位郭公子08年人工，仍然以老大炳湘最高，𢭃284萬銀，升幅近四成，不過人工最高唔係焦點，華華覺得重點係喺註釋度，「上列薪金，津貼及實物利益已包括港幣七十七萬的有薪假期，按比例的雙糧及代通知金。」根據勞工處網頁，代通知金係畀啲被炒魷嘅員工，堂堂郭家大少、藍籌公司前主席要收代通知金，都算創紀錄喇！而據新地之前嘅通告，被貶為非執董之後郭炳湘每年只收10萬蚊董事袍金。至於兩位細佬炳江同炳聯08年度就分別攞210萬同227萬，人工升幅6%。
新地一眾高層中，以執董黃植榮人工最高，08年𢭃1398萬銀，升幅3.5%。論到人工加得最勁嗰個，就非執董黃奕鑑莫屬，佢總酬金加咗55%，至1341萬銀；當中酌情花紅升近一倍，有成921萬銀。

李華華
mailto:[email protected]