【李八方online】邊位議員用1萬蚊 請姚松炎做助理?
姚松炎朱凱廸
根據議員開支申報,朱凱廸6月時用一萬蚊請姚松炎做助理。議員開支申報單據
前專業議政立法會議員姚松炎上年7月被政府DQ議席,今年3月輸埋立法會九龍西補選,但原來議會佢嘅議會之路,仲未走到盡頭。八方發現,議會陣線議員朱凱廸同埋新同盟議員范國威,今年6月開始分別以每個月10,000元請姚松炎做助理,等姚松炎可以成功「返回議會」,為民主派助拳。
根據議員向立法會提供嘅營運開支償還款額申請,朱凱廸同范國威分別向立法會申報姚松炎出任其議員助理。據朱凱廸嘅申報,佢5月開始用6,190元聘用姚松炎,至6月就加到10,000元;至於范國威就喺6月同樣以10,000元聘用姚松炎做助理。
八方向范國威了解,佢話自己只有兩個全職助理做政策研究,人手時有不足,之前同姚松炎討論過合作,大家一拍即合,於是以「兼職政策顧問」嘅形式,透過受薪方式聘用姚松炎。姚松炎而家每星期會同佢哋開兩次會,范國威形容姚松炎喺沙中綫、高鐵等方面都提供非常專業嘅意見,形容「助力好大,有好多專業意見」,相信合作會持續。
朱凱廸就同八方講,姚松炎係以顧問方式參與議辦工作,主要工作有3個,包括每星期一次向團隊授課,教授經濟、房地產知識,阿廸形容「好充實,大家都好enjoy」;其次就會同阿廸每星期做一次FB Live,講吓一周時事;最重要就係做團隊嘅「百科全書」,有咩大家都好鐘意問姚生意見咁話。
阿廸坦言,而家姚生嘅工作量同佢所得係唔成正比,不過辦事處資源有限,而家真係畀到咁少,如果有更多資源佢都希望可以畀多少少喎。至於合作關係會維持幾耐?阿廸就話按姚松炎意願,合作關係都好自由,佢個人就當然希望可以一直合作落去喇。