噚晚「雙牙戰」，緊足全場，葡萄牙VS西班牙，3:3和波。「古靈精怪估波團」又未有人估中波膽，只有八両金估中葡萄牙贏3球，但冇諗過西班牙強勢追番，和波收場。

今晚9點，就有阿根廷對冰島，呢場波其實都有睇頭，論牌面，阿根廷當然係大熱，隊長美斯早前仲話係佢贏世盃嘅最後機會，上屆就係差少少，畀德國捧走個冠軍。阿根廷猛將如雲，冰島相對可能冇咁勁，但勝在冰島近年肯搏，16年歐國盃表現叫球迷另眼相看，佢哋今次首次殺入世界盃32強，球隊全力以赴會爭取好成績，球評更視佢哋係「黑馬」。比賽嘅嘢，真係好睇臨場表現，夏蕙BB話睇好冰島險勝阿根廷1:0。

阿根廷VS冰島

0:1
黃夏蕙：阿根廷已經係出咗名啦，亦都係大熱嘅，但係我鍾意冰島，冰島人口好少，而且佢係第一次出場，咁佢地群策群力，都會盡力，我諗呢次真係會爆冷，我睇1:0。

1:1
八両金：阿根廷VS冰島，當然呢兩個地方都非常之遠，一個就凍冰冰嘅，但係就靚女多，當然喺呢個情況之下，我買佢哋1:1和波。

3:0
林作：呢場好易估，阿根廷其實o依家好鬼弱，又係打一個美斯，剩低啲球員真係可能史上最渣嘅一隊波。不過，冰島作為一個咁細，區區幾百萬人口（按：約34萬）嘅北歐國家，數學嘅或然率證明佢哋冇可能成日再爆冷，所以阿根廷贏硬，而且我覺得至少贏到3:0。

2:0
俄仔Ansheles：阿根廷我都唔知佢哋打成點，兩隊比較，我鍾意冰島多啲，我本身係俄羅斯人，我好鍾意凍天，Iceland個名入邊有冰，我話佢贏2:0。

一網睇盡
足動世盃 直擊俄國最前線
https://hk.feature.appledaily.com/worldcup2018/