鄭雨滇同雷神屬於體重較低嘅一對華洋大師傅，兩人不約而同開季以來超磅替115磅以下輕磅馬執韁都未甩過三甲，顯示佢哋超磅都要騎嘅馬必定有計。今次田草賽事中，重頭戲係第七場慶典盃，全場共有三匹113磅馬列陣，其中「風花雪月」及「得盛」正正就係超磅分別起用莫雷拉及鄭雨滇，表現令人期待。
「風花雪月」係摩廐今場五駒中，跑1400米最拿手嘅成員之一，同程累積五戰三勝兩負，上季兩次配雷神獲一冠一亞冇失Q。自上個月尾過檔後，雷神一直主操此駒，包括親試泥閘，重視有加，睇番雷神今季兩匹超磅馬「金滿載」及「貳寶」分別捧走特首盃及廣東讓賽，今次肯超磅騎「風花雪月」足以問鼎G3慶典盃。至於「得盛」同程11戰兩W四P，逾半數上名，過往三季頭三場內必有頭馬見面，上個月尾已跑過1400米受阻仍近，匆匆再戰此程，盃賽當前可藉輕磅偷襲對手。